Maak ’n verskil met Koop-’n-Afrikaanse-boekdag

Op 14 Augustus vind Koop-’n-Afrikaanse-boekdag vir die 16de jaar agtereenvolgens plaas en jy kan boeke op hierdie dag teen ’n winskopie vir jou en jou kinders koop.

“Kinders wat kan lees, vaar beter in die skool en kan later ’n konstruktiewe rol in die samelewing speel,” sê Chareldine van der Merwe, projekbestuurder van die Vriende van Afrikaans (VVA), ’n divisie van die ATKV.

“’n Kind of ’n mens wat lees, verstaan die wêreld beter, weet die wêreld is veel groter as sy leefwêreld, weet ons is nie almal eenders nie en besef ons dink ook nie eenders oor sake nie. Iemand wat lees het ’n geleentheid om ander mense met respek te hanteer.”

Die idee om ’n dag af te staan aan die Afrikaanse letterkunde het by Nolte Smit, ’n ATKV-lid, posgevat en sedertdien het lesers, skrywers en uitgewers by dié dag baat gevind .

“Dis in alle opsigte ’n wen-wendag, want lesers, skrywers, uitgewers en boekwinkels word bevoordeel. Lesers kry afslag op boeke waarvoor skrywers tantième verdien. Hoe meer boeke verkoop word, hoe beter vir die totale Afrikaanse boekbedryf, en jy kan deel wees hiervan,” sê Chareldine.

Volgens haar kan jou deelname aan die dag kinders help wat nie maklik toegang tot boeke het nie.

“’n Kind in die grondslagfase behoort 40 boeke per jaar te lees. In sommige van ons gemeenskappe lees kinders een of twee boeke per jaar.

“Daar kan baie redes voor wees soos dat hulle nog nooit ’n boek besit het nie, dat hulle skoolbiblioteek nie genoeg voorraad het nie of dat daar niemand in hulle omgewing is wat hulle inspireer of motiveer om te lees nie.”

Daar is bevind dat net 14% van Suid-Afrikaners aktief lees, terwyl daar in 58% van huishoudings nie ’n enkele boek is nie.

’n Derde van ouers vertel nie vir hul kinders stories nie en nog 50% het nog nooit vir hul kinders ’n boek voorgelees nie.

Verder het PIRLS (Progress and International Reading and Literacy Study) bevind dat byna 80% van graad 4-leerders nie met begrip kan lees nie.

“Dink ’n bietjie: ons kan hierdie statistieke verander en ’n leesrevolusie veroorsaak.

“Gebruik Koop-’n-Afrikaanse-boekdag 2020 om iemand se lewe te verryk met ’n boek.

Maak solank ʼn lysie van al die boeke wat jy wil gaan koop.

“Ek glo dat ’n huis sonder ’n boek, is soos kos sonder sout – daar kort iets.”

Deelnemende boekwinkels sluit in:

Protea Boekhuis Publisher	012 343 6279
Protea Distr Centre	021 699 8506
Protea Bloemfontein	051 444 1212
Protea Carlton	011 331 5144
Protea Hatfield	012 362 3444
Protea Parow	021 911 2411
Protea Potchefstroom	018 297 1583
Protea Cape Town	021 685 9380
Protea Soweto	011 933 1330
Protea Stellenbosch	021 882 9100
Protea TUT Church Street	012 320 0793
Protea TUT Pretoria West	012 327 4555
Protea UCT	021 650 2485
Protea UJ	011 482 3566
Protea Vaal	016 932 1791
proteaboekwinkel.com	012 362 3444
PNA Strand Square	072 217 2712
PNA Somerset Square	072 217 2712
PNA Colours	072 217 2712
PNA Eikestad Mall	072 217 2712
PNA The Sanctuary	072 217 2712
PNA Whale Coast	072 217 2712
PNA Gordon’s Bay Mall	072 217 2712
PNA Swellendam	072 217 2712

Deelnemende Protea-boekwinkels sal 20%-afslag gee op alle Afrikaanse boeke (uitgesluit boeke wat reeds afgemerk is) en geld vanaf 14 – 21 Augustus. Deelnemende PNA-winkels sal 25%-afslag gee vanaf 14-16 Augustus.