ATKV-DigiToneel 2025: Top-8 gereed

Die ATKV se gewilde TV-realiteitsreeks, Gekies vir die Kollig, keer in 2025 vir die vyfde keer terug na jou skerm – en vanjaar is die tema eenvoudig onweerstaanbaar: magneties. Soos hemelliggame wat mekaar aantrek in ’n perfekte wentelbaan, is agt uitsonderlike jong akteurs vanjaar gekies om na die stel van dié realiteitsreeks genooi te word, waar hulle hul finale treë gaan gee voordat die kameras vir hierdie seisoen begin rol.

Dié topagtfinaliste word in Julie na die stel van Gekies vir die Kollig genooi, waar hulle onder die magnetiese inspirasie van vanjaar se vier mentors – Jacques Bessenger, Marlo Minnaar, Lindsey Abrahams en Hannah Borthwick – hul tegniek en spel sal slyp. In hierdie laaste fase, net voor hul televisiedebuut, wag daar nuwe energie, inspirasie en ’n verrassende kinkel…

Want in 2025 wag daar nie net vier episodes nie, maar vyf! Dis reg – die wentelbaan is langer, die aantrekkingskrag sterker en die uitdaging groter. Dié ekstra episode bring ’n vars aanslag vir deelnemers én ’n nuwe spanningselement vir kykers.

Die finaliste se werk sal in die program beoordeel word deur ’n splinternuwe beoordelaarspaneel wat geen vorige blootstelling aan hul produksies gehad het nie. Hierdie objektiewe benadering verseker dat elke produksie op sy eie magnetiese meriete beoordeel word.

Solomon Cupido keer met sy kenmerkende charisma as aanbieder terug en is gereed om nie net voor die kamera leiding te verskaf nie, maar ook agter die skerms wenke met die finaliste te deel.

Volgens JJ van Niekerk, projekorganiseerder van ATKV-DigiToneel, was vanjaar se seisoen een wat getuig van kreatiewe aantrekkingskrag. 

“Daar was ’n duidelike energie wat sekere deelnemers eenvoudig na die kollig aangetrek het. Hierdie agt finaliste het ’n soort swaartekrag van talent wat nie misgekyk kon word nie.”

Eduard de Villiers van Franschhoek High met Skop
Ethan Bester van Hoërskool Randburg met wondermooi
Janru Steenkamp van Hoërskool Durbanville met 'n Montage vir die man in die maan
Keagan Cooper van Hoërskool Noordheuwel met Oudi(sies)
Line Allen van Hoërskool Noordheuwel met ’n Lem sonder ’n landlyn
Moya Erasmus van Hoërskool Die Wilgers met Die somtotaal van sewentien
Nina Strydom van Hoërskool Parel Vallei met Wou jy my iets vra?
Zanje Bodenstein van Hoërskool Die Wilgers met Skooldasse breek nie

Hier is die topagtfinaliste van ATKV-DigiToneel 2025:

Naam van deelnemer Skool Produksie
Eduard de Villiers Franschhoek High Skop
Ethan Bester Hoërskool Randburg wondermooi
Janru Steenkamp Hoërskool Durbanville ’n Montage vir die man in die maan
Keagan Cooper Hoërskool Noordheuwel Oudi(sies)
Line Allen Hoërskool Noordheuwel ’n Lem sonder ’n landlyn
Moya Erasmus Hoërskool Die Wilgers Die somtotaal van sewentien
Nina Strydom Hoërskool Parel Vallei Wou jy my iets vra?
Zanje Bodenstein Hoërskool Die Wilgers Skooldasse breek nie

Maak gereed om vasgevang te word in die aantrekkingskrag van Gekies vir die Kollig, wat vanaf Oktober 2025 op VIA (DStv-kanaal 147) uitgesaai word.

Dis magneties. Dis kragtig. Dis die volgende wentelbaan van Afrikaanse jeugteater.

Kyk hier na die aankondiging van die top-8.