ATKV-vennootskap bied Afrikaanse boedelhulp
Die ATKV is trots om sy vennootskap met Eksekuteurs vir Boedels en Testamente aan te kondig: ’n diens wat ontwerp is om professionele, wettige en uitvoerbare testamente kosteloos op te stel, en om uitnemende boedeladministrasie te bied – alles in Afrikaans.
As deel van die vennootskap het ATKV-lede nou direkte toegang tot hierdie spesialisdiens, wat ondersteun word deur Capital Legacy – Suid-Afrika se grootste boedeladministrasie-maatskappy.
Deur Eksekuteurs vir Boedels en Testamente kry ATKV-lede nie net ’n gratis testament nie, maar ook blootstelling aan ’n grondverskuiwende produk wat alle koste dek wat ontstaan wanneer iemand sterf – van regsfooie tot boedelbereddering.
“Dit is vir die ATKV belangrik om in sy lede se behoeftes te voorsien deur voortdurend sy produkaanbod uit te brei en relevant te hou,” sê Jackie Ströh, bestuurder van die ATKV se ledesakeafdeling.
“Met hierdie vennootskap maak die ATKV ’n noodsaaklike diens aan sy lede in hul eie taal toeganklik.”
Ströh sê die besluit om met Eksekuteurs vir Boedels en Testamente saam te werk, was vanselfsprekend.
“In Eksekuteurs vir Boedels en Testamente het ons ’n vennoot gevind met ’n sterk gevestigde handelsmerk en waardes wat met die ATKV s’n ooreenstem.”
Dawid Botha, stigter en besturende direkteur van Eksekuteurs vir Boedels en Testamente, sê die vennootskap gaan oor meer as net gemoedsrus.
“Ons sien die vennootskap as ’n manier om ’n kulturele nalatenskap te bou; om seker te maak dat Afrikaanse gesinne hul erfenis en taal waardig aan hul nageslag kan oordra.”
Botha sê miljoene mense in Suid-Afrika het geen testament nie, of dit is nie korrek opgestel en uitvoerbaar nie. Dit veroorsaak onnodige kostes, vertraging en spanning wanneer ’n geliefde sterf.
“Eksekuteurs vir Boedels en Testamente maak dit makliker, bekostigbaar en toeganklik vir ATKV-lede om hul sake in orde te kry – in hul eie taal en kultuurkonteks.”
*’n Gedeelte van elke transaksie sal help om ATKV-veldtogte uit te brei.
Kontak gerus vir Jackie Ströh per e-pos by jackies@atkv.org.za of telefonies by 076 136 1419, of vir Dawid Botha per e-pos by dawid@eksekuteurs.co.za of telefonies by 084 777 0945 vir meer inligting.
