ATKV vier fees saam met die Taalmonument
Vanjaar vier verskeie organisasies groot verjaardae – die Afrikaanse Taalmonument en -museum (ATM) se 50ste bestaansjaar, die ATKV se 95ste jaar as kultuurtuiste en Afrikaans se 100ste jaar as amptelike landstaal.
Die Taalmonument is op 10 Oktober 1975 tydens die eeufees van die stigting van die Genootskap van Regte Afrikaners (GRA) ingewy. Dié is op 14 Augustus 1875 in die Paarl gestig deur ’n groep Afrikaanssprekendes van die Westelike provinsie.
Die gerestoureerde huis waar die GRA gestig is, is vandag ’n museum en het kontemporêre uitstallings, oor onder meer Arabiese Afrikaans en die taal se musikale avontuur.
Die monument teen die hange van Paarlberg is deur Jan van Wijk ontwerp en simboliseer die vestiging van ’n nuwe taal met wortels in verskeie ander tale.
Een van die hoogtepunte op die feesprogram is die Afrikaans Amptelik 100-makietie wat op 25 Oktober gehou word. Dié geleentheid, wat vroeër vanjaar weens weersomstandighede uitgestel is, sluit die amptelike program van die Afrikaans 100-veldtog af.
Die dag se verrigtinge begin om 11:00 en duur tot 19:00. Dit vind in die amfiteater by die Afrikaanse Taalmonument plaas. Kaartjies kos R60 per persoon, en kinders onder 13 jaar geniet gratis toegang.
Feesgangers kan uitsien na optredes deur rieldansers, volkspelegroepe en verskeie kunstenaars, onder andere RJay, LK, Jitsvinger, Marsha Bothma, Selby Williams, Nadia Louw, David Fourie, Nadine, Jak de Priester en die Kaapse Lawaaimakers.
Die seremoniemeesters vir die dag is die bekende Lyntjie Jaars, Danneline Ramsden en Dean John Smith.
Kom beleef hoe Afrikaans smaak by die kos- en kunsmark met tradisionele Suid-Afrikaanse geregte en geniet boetiekbier en wyn uit die Kaapse wynlande. Daar is stalletjies met handgemaakte items, ’n kinderarea vir die jongspan, ’n braaikompetisie vir hoërskole en verskeie musiekkunstenaars vir alle smake.
Die ATKV dra met trots by tot die vermaak met rielgroepe en optredes van twee ATKV-Crescendo-opnamekunstenaars, naamlik Selby Williams en Marsha Bothma.
Gerrie Lemmer, uitvoerende hoof: kultuur van die ATKV, sê die ATKV se betrokkenheid is kuns- en kultuurgedrewe deur kunstenaars wat optree tydens die fees.
“Op dié manier maak ons ’n waardevolle en vermaaklike bydrae tot die fees en voeg ook waarde toe tot die kulturele ervaringe van feesgangers. Die ATKV se eie produkte en kunstenaars bied aan die gehoor die geleentheid om te beleef hoe die ATKV daagliks deel van die Afrikaanse landskap is.
“Vir die ATKV is dit belangrik om Afrikaans in sy totaliteit te vier, sowel as elke persoon, organisasie of instansie wat tot die volhoubare groei van Afrikaans bydra.”
Gerrie sê die ATKV is vyf jaar ná die erkenning van Afrikaans as amptelike taal gestig.
“Die ATKV het vir 95 van die 100 jaar diep taalspore getrap. Oor die jare is nog taalorganisasies gestig wat saam met die ATKV ons pragtige taal bevorder het. Dit is ’n riem onder die hart om te sien hoe almal bymekaarkom om Afrikaans te vier. Dit is ’n feesviering vir elke instansie en persoon wat daagliks in ons taal werk.”
Hy sluit af en sê wanneer ons mekaar kan sien en mekaar se mylpale vier, bou ons ’n lewende erfenis en ’n blink toekoms vir Afrikaans.
Bespreek jou kaartjies vir die feesmarkmakietie hier: https://tickets.tixsa.co.za/…/afrikaans-100-makietie-paarl
- Die ATM se amptelike 50-jaar-vieringe sluit ook in die 50ste bestaansjaarbal op 15 November en die Musiekfees Oppie Berg saam met Watershed op 6 Desember.
- Benewens die feesvieringe is daar ook ander ervarings waaraan besoekers by die Afrikaanse Taalmonument kan deelneem, soos ’n slangkursus op 1 November, ’n sterrekykpiekniek op 14 November en die jaarlikse aandwedloop en pretstap op 10 Desember.