Langsous-tak bring ‘Boytjie’ na Mosselbaai
As ’n jong seun op die Kaapse Vlakte het hy op ’n dag van die huis af weggehardloop – weg van mishandeling, armoede en hopeloosheid. Daar moet iets beter wees, het Boytjie geglo.
Van daardie dag af het dinge vir Johnny Davids, bekroonde TV- en radio-aanbieder, sanger en skrywer begin verander. Die verhaal van sy pad na genesing is opgeteken in sy memoire, Boytjie, en ook vir die verhoog verwerk. Dit is eersdaags in Mosselbaai te sien.
Die ATKV-tak Langsous bied twee geleenthede aan: Op Vrydag 29 Augustus vind Johnny se vertoning om 18:00 by die Ridgeview Primêre Skool plaas en op Saterdag 30 Augustus om 10:00, ook by dié skool, vind ’n boekbespreking plaas, gelei deur Johnny se vrou, Liezel.
“Vrydagaand se vertoning is nie net nog ’n vertoning nie,” sê Johnny.
In samewerking met Jean-Marc Meyer, bekroonde musiekvervaardiger, kry Boytjie se verhaal lewe in ’n sielsverrykende vertoning en musikale reis ter eer van die Here.
Al die liedjies in die produksie is oorspronklik en verskyn ook op speellyste van verskeie radiostasies in Suid-Afrika en Namibië. Die treffer, “Nuwe Naam”, wat ook die titelsnit van Boytjie is, was verlede jaar boaan die gospeltrefferlys op CCFM en Radio Tygerberg. Die gehoor kan ook uitsien na “My Provider”, “Oomblik soos die”, “Hosanna” en “I am Ready”.
By Saterdagoggend se boekgesprek sal Johnny meer agtergrond gee oor sy skryfproses, die storielyn en die lesse wat hy geleer het. Hy bring ook eksemplare van sy boek saam, wat R260 beloop. Toegang tot die bespreking is gratis.
Kaartjies vir Vrydagaand beloop R100 en kan verkry word by Claire du Plessis by 079 497 6156 of by die Garden Route Primêre Skool, die Erika Primêre Skool, die Diaz Primêre Skool, die Ridgeview Primêre Skool, die St Blaize Primêre Skool, die EK Primêre Skool, die St Lukes Primêre Skool, die Denneprag Primêre Skool, die Groot-Brakrivier Primêre Skool en die Laerskool Ruiterbosch.
*Johnny Davids is onder meer ’n aanbieder van Kwêla en Ysters op die landgoed op kykNET en Landbouweekliks op VIA, en ’n krieketkommentator op SuperSport.