ATKV-Applous 2025: Wenkore aangewys
ATKV-Applous is die oudste skoolkoorkompetisie in Suid-Afrika. Die finaal word vanjaar vir die 48ste keer aangebied, vanaf 30 Julie tot 2 Augustus 2025 in die ZK Matthews-saal by Unisa in Pretoria.
Gedurende Mei het ATKV-Applous se streeksfeeste plaasgevind, en het die koorbeoordelaars na ’n fenomenale 292 kore geluister, wat meer as 20 000 hoër- en laerskoolleerders van regoor Suid-Afrika en Namibië verteenwoordig.
Die omvang van hierdie toonaangewende kompetisie is só verreikend en omvattend dat die finaal oor vier aande strek. Uit die aanvanklike 292 kore word daar in 2025 uiteindelik 36 kore as finaliste uitgenooi, wat mekaar die stryd aansê in elf kategorieë.
ATKV-Applous sal ook binnekort die top 10 junior kore van 2025 bekendmaak.
Op Woensdag 30 Julie het tien kore in drie kategorieë om die louere meegeding, insluitend twee laerskoolkore van Namibië. Hierdie kategorieë is Laerskool-ope, Laerskool-meriete: Afrikaans en Hoërskool-ope. Benewens die kategoriewenners in elk van hierdie kategorieë, word sertifikate ook in die Laerskool-meriete: Afrikaans-kategorie oorhandig vir die beste uitvoering van ’n voorgeskrewe lied, die beste uitvoering van ’n Afrikaanse komposisie en die beste uitvoering van ’n Afrika-lied.
Die volgende kore stap met die louere weg:
Laerskool-ope
St George’s Diocesan School
Laerskool-meriete: Afrikaans
Laerskool Mooirivier
Hoërskool-ope
Hoërskool Pearson
Die beste uitvoering van ’n voorgeskrewe lied
Laerskool Mooirivier
Die beste uitvoering van ’n Afrikaanse komposisie
Laerskool Mooirivier
Die beste uitvoering van ’n Afrika-lied
Laerskool Mooirivier
Volgens Corneli Quinn, ATKV-Applous-projekorganiseerder, is ’n skoolkoorkompetisie soos ATKV-Applous van sleutelbelang. Sy beklemtoon dat hierdie vooraanstaande kompetisie “hoë standaarde in klankuitvoering, musikaliteit en interpretasie inspireer. Kore word aangemoedig om hul tegniek te verfyn, met repertoire te eksperimenteer en saam te werk om gepoleerde optredes te lewer”.
Daarbenewens, sê Quinn, bevorder ’n kompetisie soos ATKV-Applous lewensvaardighede soos dissipline, deursettingsvermoë en spanwerk. Die koorlede leer verantwoordelikheid en veerkragtigheid. By ATKV-Applous word die kore ook aangemoedig om musiek in inheemse tale, tradisionele liedere én kontemporêre werke te sing. Sodoende word kulturele erfenis bewaar en gevier terwyl diversiteit en inklusiwiteit bevorder word.
Kontak gerus vir Corneli Quinn, ATKV-Applous-projekorganiseerder, per e-pos by corneliq@atkv.org.za of telefonies by 011 919 9012, of vir Bessie Keun, ATKV-Applous-organiseerder, by bessie@applous.co.za of telefonies by 072 598 1480 vir enige navrae.
Vir meer inligting oor ATKV-Applous, besoek gerus die ATKV-Applous-webblad by https://atkv.org.za/neem-deel/kultuurprojekte/applous/.