‘Groen regmerkies’ vir Tjokkertoneel-wenaktrise
“Volgens my het Berné haar vertolking van Ouma met vlieënde vaandels geslaag. Haar stem en veral haar lyfspel was geloofwaardig. Van die manier waarop die regisseur die gehoor met atmosfeer geprikkel het en die stelinkleding, tot die interaksie tussen die hoofkarakter Lexi en Berné se Ouma het my elke oomblik oortuig.” – JJ van Niekerk, ATKV-Tjokkertoneel-projekorganiseerder
Berné Peters het die nasionale Tjokkertoneeltoekenning as beste aktrise verwerf vir haar vertolking van die rol van Ouma in die drama Dertien.
Tjokkertoneel-projekorganiseerder JJ van Niekerk wys daarop dat die talent om ’n ouer persoon geloofwaardig te speel, een van die moeilikste vaardighede is wat enige jong akteur kan bemeester, vandaar die gebruik van teatertegnieke soos poppespel om die proses te vergemaklik. Die Laerskool De Hoop het besluit om konvensie agterweë te laat en onmiddellik vir Berné die geleentheid te gee.
Terwyl die uitdaging terstond was, kom Berné se gereedheid en bereidheid van ver af.
“Ek het van kleins af graag soos ’n prinses opgedress,” vertel sy. “En toe ons Somerset-Wes toe trek, het my mamma my by Stage Right Drama ingeskryf en daar het my liefde vir drama net groter en groter geword.”
Tussen toe en nou het Berné ook waardevolle lesse uit mislukking geleer, onder meer drie ongeslaagde pogings om vir “De Hoop’s Got Talent” te kwalifiseer.
Maar toe, sê sy, het meneer Samuel haar raakgesien en, met die skool se ondersteuning, vir haar die geleentheid gegee om die rol van Ouma in Dertien te vertolk.
Sy het die kompleksiteit en uitdagings van die rol met ope arms verwelkom.
“Ek het nog altyd gehou van komiese rolle, veral ouma-tipe rolle,” vertel sy. “Maar ek weet ook dat ’n mens net in drama kan groei as jy jouself diep ondersoek en uitdaag. Hoe beter jy die karakter leer ken, hoe makliker word dit om dit te speel.”
Saam met die waardevolle drama-ervaring en toekenningserkenning het Berné ook lewenslesse ryker geword.
“Ek het geleer ’n mens moet daarna streef om jou beste te gee en as jy besluit het om dit te doen, moet jy nooit moed opgee nie.”
Voor die toekenningseremonie was hierdie besef nie net ’n beginselsaak nie – dit was ’n saak van gebed. “Voor die seremonie het my ouma saam met my gebid en sy het vir my gesê die Here het vir haar groen regmerkies laat sien,” vertel Berné. “Toe ek hoor ek is genomineer, het ek reënboog-regmerkies gesien en toe ek as wenner aangewys word, het ek net gedink, ‘Dankie, Here!’”
Berné se toekenning is nie net ’n uitmuntende prestasie nie. Dit is ’n indrukwekkende mylpaal op pad na haar groot droom. “Ek wil eendag ’n aktrise word; ek wil in mense se harte kruip en hulle inspireer om hul drome te volg met my storie … My eerste rol was as ’n fluitspelertjie in ’n graad R-konsert, en nou is ek al die beste aktrise van Tjokkertoneel!”
Dit is iets om op trots te wees – én ’n jong speler om dop te hou!
