Opwinding heers oor ATKV-Applous 2025
ATKV-Applous is dié toonaangewende skoolkoorkompetisie in Suid-Afrika. In 2025 het ’n asembenemende 286 kore vir die kompetisie ingeskryf, wat meer as 20 000 hoër- en laerskoolleerders verteenwoordig.
Die 286 koordirigente en hul koorlede is reeds voluit besig met stemopwarming- en oefensessies. Stemgroepe en solosangers is geïdentifiseer en die kore werk onverpoos aan intonasie, melodie en harmonie, dinamika, tempo, ritme en klankkleur.
Met elke noot en akkoord, elke oefening en repetisie, streef die kore met geesdrif en ’n fyn noukeurigheid om hul merkwaardige musikale vermoë ten toon te stel, en elkeen hoop om vanjaar met die ATKV-Applous-louere weg te stap.
Dit is daarom glad nie ’n verrassing dat die ATKV-Applous-span besonders opgewonde is vir die landswye streeksfeeste wat in Meimaand op hulle wag nie.
Die span, vergesel van ’n afvaardiging van Suid-Afrika se mees kundige en gesaghebbende koorbeoordelaars, reis gedurende Mei na 18 bestemmings regoor Suid-Afrika en Namibië met die doel om 40 topkore te identifiseer.
Vanjaar se eerste streeksfees vind reeds op 5 Mei in KwaZulu-Natal plaas, wanneer die ATKV-Applous-span en beoordelaars na Empangeni reis. Hierna volg Pietermaritzburg op 6 Mei en Newcastle op 7 Mei. Op 7 Mei vind ’n tweede streeksfees ook in Potchefstroom plaas, waarna die span op 8 Mei in Randburg ’n draai maak.
Die Vrystaat en Noord-Kaap volg in die daaropvolgende week, met streeksfeeste in Bloemfontein op 12 Mei, Kimberley op 13 Mei en Upington op 14 Mei. ’n Besonderse streeksfees oor drie dae word vanaf 15 tot 17 Mei in Pretoria beplan. ’n Indrukwekkende 35 hoërskoolkore en 55 laerskoolkore asook ’n koor van die Transoranje Skool vir Dowes neem aan die Pretoriase streeksfees deel.
Die Oos- en Wes-Kaap is volgende. Streeksfeeste vind op 19 Mei in Oos-Londen, op 20 Mei in Gqeberha en op 21 Mei in George plaas. Vanaf 22 tot 24 Mei kuier die ATKV-Applous-span en beoordelaars in Kaapstad.
In die laaste week van Mei maak die ATKV-Applous-span draaie in Mpumalanga, Limpopo en die Noordwes. Op 26 Mei is Witbank aan die beurt, waarop Nelspruit op 27 Mei volg. Hierna reis die span op 28 Mei na Polokwane en op 29 Mei na Rustenburg.
Vroeër in die maand, oor die naweek van 9 tot 10 Mei, reis die span na Swakopmund en Windhoek om ook in Namibië na dié land se beste kore te gaan soek.
Gehore by die verskeie streeksfeeste het baie om na uit te sien. Elke kooroptrede beloof om te betower. Dit is ’n geleentheid waar talentvolle sangers met hul passie en vaardighede kan spog. Elke koor neem die gehoor op ’n emosionele reistog met sielsroerende, dog opgewekte optredes.
Gehore kan ook uitsien na ’n diverse repertoire. Benewens die voorgeskrewe liedere, wat op sigself uiteenlopend is, sing die kore ’n opwindende koorprogram, insluitend Afrikaanse koorwerke, koorwerke in een van Suid-Afrika se amptelike tale wat nie Afrikaans of Engels is nie, en koorwerke van hul eie keuse in verskillende tale en diverse style.
Die professionele beoordeling van die kompetisie is ook van kernbelang. Gehoorlede sal ’n dieper insig oor die kuns van koorsang ontwikkel te danke aan die besonderse kundigheid van die beoordelaars wat ATKV-Applous ten tyde van die kompetisie benut.
Almal is uitgenooi om die streeksfeeste in hul kontrei by te woon, om inspirerende jong koortalent te ondersteun en die toewyding van ’n nuwe generasie musici te vier.
Na afloop van die landswye streeksfeeste sal die kore wat tot die finaal van ATKV-Applous 2025 deurgedring het, bekendgemaak word. Tydens die finaal sal Suid-Afrika en Namibië se beste skoolkore mekaar die stryd aansê om as dié beste skoolkoor gekroon te word.
Die finaal van ATKV-Applous 2025 vind vanaf 30 Julie tot 2 Augustus 2025 in die ZK Matthews-saal by Unisa plaas. Hou gerus die pers dop vir meer inligting oor vanjaar se finaal, wat reeds beloof om ’n spoggeleentheid te wees.
Moenie hierdie onvergeetlike fees van talent, passie en die vreugde van koormusiek misloop nie!
Kontak gerus vir Corneli Quinn, ATKV-Applous-projekorganiseerder, per e-pos by corneliq@atkv.org.za of telefonies by 011 919 9012, of vir Bessie Keun, ATKV-Applous-hulporganiseerder, by bessie@applous.co.za of telefonies by 072 598 1480 vir enige navrae.