In hierdie afdeling

Die ATKV-Jeugberaad is ’n jaarlikse ATKV-inisiatief wat spesifiek vir oopkopdenkers in graad 10 en 11 ontwikkel is. Hierdie opwindende byeenkoms bied aan leerders die unieke geleentheid om saam te kom gesels oor aktuele sake soos politiek, die ekonomie, die VN se volhoubare ontwikkelingsdoelwitte, die onderwys, tegnologie en die samelewing – almal belangrike temas wat ’n direkte invloed op leerders se lewens het. Dit is nie net ’n geleentheid om hul perspektiewe te verbreed nie, maar ook om nuwe insigte te verwerf en aktief deel te neem aan die gesprekke wat die toekoms vorm.

By die ATKV-Jeugberaad tree ervare sprekers op wat leerders ’n dieper begrip van die wêreld om hulle bied. Sprekers soos Albert van Wyk (How to Become a Millionaire at 22), Dawie Roodt (Efficient-groep), Pieter du Toit (News24), Deon Meiring (Glaskas) en prof. Edwin Theron (Universiteit Stellenbosch) deel hul kennis en ervarings om leerders te inspireer en aan te moedig om aktiewe deelnemers in die samelewing te wees.

Die program sluit ook ontspanningsaktiwiteite in, waar leerders die geleentheid kry om die fasiliteite van die ATKV-oorde te geniet en sterk vriendskapsbande met hul eweknieë van ander skole te vorm. Hierdie bande bly dikwels voortbestaan selfs nadat die ATKV-Jeugberaad verby is, en dra by tot ’n ryker skoolervaring.

Alle deelnemers aan die ATKV-Jeugberaad ontvang ’n ATKV-bywoningsertifikaat as erkenning vir hul deelname en betrokkenheid.

Vir meer inligting oor die ATKV-Jeugberaad, kontak asseblief vir Magon Mouton by magonm@atkv.org.za, of skakel 011 919 9051.

ATKV-Jeugberaad 2024: Inskrywingsvorm

ATKV-Jeugberaad 2024: Entry form

Sit jy met jou hande in jou hare as dit kom by die kweek van jong leiers in die klaskamer? Vrees nie, die ATKV se Aktiwiteitshandleiding vir Leierskapsontwikkeling is net vir jou. Vind van ysbrekers tot aktiwiteite om leerders te help om beter te kommunikeer, beter te luister en nog vele meer in hierdie maklike gids.

Daar is speletjies te kies en te keur – of jy net 5 minute het of ’n halfuur om die jongklomp besig te hou. Sommige van
die speletjies kan jy sommer in jou klaskamer speel, terwyl ander op die rugbyveld gespeel word. ’n Lys van rolprente met uitgewerkte vraelyste is ideaal vir begripsinoefening.

Die ATKV besef dat onderwysers baie besig is en nie altyd die tyd het om speletjies uit te dink nie. Met die ATKV se Aktiwiteitshandleiding vir Leierskapsontwikkeling wil ons jou hande sterk maak en ook ’n verskil in jong mense se lewe maak.

Die eerste uitgawe van die Aktiwiteitshandleiding vir Leierskapsontwikkeling is in Afrikaans, Engels en in Zoeloe beskikbaar en kos net R100 elk. Spesiale pakkette is ook beskikbaar.

Vir inligting of bestellings kontak vir Magon Mouton by 011 919 9051 of stuur ’n e-pos aan magonm@atkv.org.za.

Klik hier vir ’n voorsmakie. Gaan loer gerus en bestel nou die Aktiwiteitshandleiding vir Leierskapsontwikkeling!